जसरी भएपनि टिकिन्छ : जानु अर्याल
नेपालअष्ट्रेलियान्युज सम्वाददाता
हरेक सिनेमामा एउटै अनुहार अनि एकैप्रकारको उपस्थिति हेर्दा-हेर्दा दिक्क बनेका नेपाली चलचित्रका दर्शकका लागि अब फ्रेस अनुहारहरु धमाधम नया“ चलचित्रमार्फत देखिन थालेका छन् ।
त्यस्तै फ्रेस अनुहारमा अहिलेको आशालाग्दो अनुहार हुन्-जानु अर्याल । जानुलाई नेपाली सिनेमामा उभ्याउने काम गरेका छन् निर्देशक दिनेश खड्का र निर्माता सम्भवत श्रेष्ठले । चलचित्र हो "द मोष्ट वान्टेड" महेन्द्रनगरकी जानु यतिबेला नेपाली चलचित्र उद्योगमा जमेरै अगाडि बढ्नका लागि काठमाडौंमा छिन् । प्रस्तुत छ, उनीसँग गरिएको संक्षिप्त वार्तालाप :
० महेन्द्रगरमा के गरिथ्यो नि ?
म चित्र बनाउँथे र चित्र बेच्दथे पनि ।
० चित्रकार मान्छे कसरी सिनेमा क्षेत्रमा लाग्ने सोच आयो त ?
मलाई लाग्छ सिनेमा पनि चित्रकलाकै अर्को पाटो हो । चित्रलाई मनले बझुन सक्नुपर्छ भने सिनेमालाई आँखाले । फेरि मलाई सानै उमेरदेखि कलाकारिताप्रति रुचि थियो राम्रो चलचित्र पाए खेल्छु जस्तो लाग्थ्यो ।
० चलचित्र क्षेत्रमा प्रवेश गर्नका लागि यहाँ कसै न कसैको सिफारिस चाहिन्छ भनिन्छ नि ?
मैले पनि त्यो सुनेको छु । नेपाली चलचित्र क्षेत्रमा चलिराख्नको लागि कसै न कसैको हात चाहिन्छ भने, म त भर्खर प्रवेश गरेकोले मलाई निर्देशक दिनेश खड्का दाइले यो चलचित्रमा अभिनय गराइ रहनुभएको छ । हेरौँ, पछिका दिनमा के हुन्छ ?
० चलचित्र क्षेत्रमा उचाइमा पुग्न ग्ल्यामर अति आवश्यक छ भनिन्छ नि ?
त्यो गलत हो । ग्ल्यामर पनि चाहिन्छ । तर कथाले माग्ने जति मात्र । चलचित्रमा यदि कथा त्यस्तै छ भने ग्ल्यामर प्रस्तुत गर्नुपर्छ । तर कथामा उल्लेख छैन भने जवरजस्ती ग्ल्यामर प्रस्ततु गर्नु त्यति राम्रो हुँदैन । म टिक्नकै लागि ग्ल्यामर हैन अभिनयमा जोड दिन चाहन्छु । नेपाली समाजमा परिवारसँग बसेर हेर्न मिल्ने खालको अंग प्रदर्शन हुनुपर्छ ।
० के देखेर नेपाली चलचित्र क्षेत्रमा प्रवेश गरेको ?
नेपाली चलचित्र क्षेत्रमा नाम र इज्जत छ । फेरि चलचित्रलाई व्यवसायी बनाउन चाहनेहरुका लागि राम्रो छ । यो क्षेत्रमा लागेर जिविकोपार्जन गर्नेहरु पनि त छन् नि ? त्यसैले यो क्षेत्रमा प्रवेश गरेको हो ।
० अबका दिनमा कलाकारितालाई अगाडि बढाउने कि चित्रकलालाई ?
मेरो पहिलो चलचित्र -"द मोस्ट वान्टेड" । यसमा मैले गरेको भूमिका दर्शकले कसरी मन पराउ“छन् । दर्शकले मलाई कतिको माया दिनुहुन्छ त्यसमा भर पर्छ । म कलाकारिता र चित्रकला दुवैलाई एकैसाथ मिलाएर अगाडि लैजान चाहन्छु ।
० हाम्रो समाजले नायिकालाई राम्रो दृष्टिकोणले हेर्दैन नि ?
नेपाली चलचित्र क्षेत्रका सबै नायिका नभनुँ धेरैजसो आफ्नो स्थानमा रहेका छैनन् । आफू नै मर्यादामा न रहेपछि त समाजलाई दोष दिएर केही हुँदैन । आफू ठिक ठाउँमा बस्नु पर्यो । समाजले सोचाइ परिवर्तन गर्छ । राम्रो गर्नेका लागि समाजले राम्रो नियमले हेर्छ ।
० "द मोस्ट वान्टेड" अगाडि अर्को सिनेमाको अनुभव छ ?
गरेकी छु, यस अघि मैले थारु भाषाको मोर बस्ती अर्थात् मेरा वस्तीमा अभिनय गरेकी छु ।
० नायिकाहरुको यत्रो भीड छ, यो भीडमा टिक्न सकिएला त ?
अहिले मैले अभिनय गरेको चलचित्र छायांकन मात्र भैरहेको पहिलो चलचित्र हो । यो चलचित्र रिलिज हुन दिनु्स् । दर्शकलाई मेरो काम कस्तो लाग्छ हेरौं । त्यसपछि थाहा होला । तर अहिले पनि मलाई केही चलचित्रको अफर आइरहेको छ । मेहेनत गर्दैछु । मेहनतको फल मीठो हुन्छ ।
